Агропромышленноҫ комплексӗн хисеплӗ ӗҫченӗсем тата ветеранӗсем!

Сире професси уявӗпе – Ял хуҫалӑхӗпе тирпейлекен про­мыш­лен­ноҫ ӗҫченӗн кунӗ ячӗ­пе саламлатӑп!
Хресчен ӗҫӗ нихӑҫан та ҫӑмӑл пулман, ҫавна пӑхмасӑр вӑл хӑйӗн хисеплӗхӗпе тата пурнӑҫра питех те кирлӗ пулнипе палӑрса тӑрать. Ҫӑ­кӑр ҫитӗнтерме тӑрӑшуллӑ та ӗҫчен ҫынсем ҫеҫ – тӑван ҫӗре пӗтӗм чунтан па­рӑннисем тата ӑна никамран ытла юратакансем – пултараҫҫӗ.
Чӑваш Республикин ҫӗр ӗҫченӗсен пултарулӑхӗпе ӗҫченлӗхне тата ырми-канми тӑрӑшулӑхне пула кӑҫалхи ял хуҫалӑх тапхӑрне тивӗҫлӗ кӑтар­тусемпе вӗҫленӗ.
Пухса кӗртнӗ тухӑҫ республикӑна паха тырӑпа туллин тивӗҫтерме май парать тата выльӑх-чӗрлӗх ӗрчетес ӗҫре кирлӗ выльӑх апачӗ валли те ҫитет.
Республикӑри ҫӗр ӗҫченӗсем сӗт, аш-какай, пахча ҫимӗҫ, ҫӗр улми, ҫу паракан культурӑсем туса илессине ӳстерсе пыраҫҫӗ. Хуҫа­лӑхсенче малта пыракан технологисене, производствӑпа тирпейлес ӗҫри лайӑх мел­сене ӗҫе кӗртеҫҫӗ, ку чухнехи пысӑк тухӑҫлӑ техника ту­я­наҫ­ҫӗ, инвестици проекчӗсене ӑнӑҫлӑн пурнӑҫлаҫҫӗ, ҫӗнӗ ӗҫ вырӑнӗ­сем йӗрке­леҫҫӗ.
Чӑваш Ен агропромышленноҫ комплексне патшалӑх паракан пулӑ­шӑвӑн калӑпӑшӗ 2018 ҫулта, 15 процент ӳссе, 2,7 миллиард тенке ҫитнӗ. Патшалӑх пулӑшӑвне тата ял хуҫалӑх таварӗсем туса илекенсен кал-кал ӗҫне пула отрасль тупӑшлӑ ӗҫлет.
Республика Правительстви ялти пурнӑҫ пахалӑхӗпе тата услови­йӗсемпе ҫыхӑннӑ ыйтусене тӗп вырӑна хурать. Эпир шкулсемпе боль­ницӑсене, культура учрежденийӗсене ҫӗнетсе пырас, ҫулсем тӑвас, ял территорийӗсене йӗркене кӗртес ӗҫсене, ҫав шутра пуҫаруллӑ бюджет программине пурнӑҫланӑ шайра, малалла тӑсӑпӑр. Ҫакӑ пурте ял ҫын­нисене малашлӑхалла шанчӑклӑн пӑхма тата ҫӗнӗ пысӑк тӗллевсене пурнӑҫласси ҫинчен ӗмӗтленме май парать.
Мӗнпур ҫӗр ӗҫченне, механизаторсемпе выльӑх-чӗрлӗх ӗрчете­кесене­, тирпейлекен предприятисен ӗҫченӗсене ҫӗршывӑн апат-ҫимӗҫ хӑ­рушсӑрлӑхӗпе ҫыхӑннӑ тӗллеве тухӑҫлӑн татса пама пулӑшнӑшӑн тав тӑватӑп. Эсир халӑха усӑллӑ та тутлӑ, экологи тӗлӗшӗнчен таса апат-ҫимӗҫпе тивӗҫтеретӗр. Чӑваш Енре пурӑнакансем сирӗн пултаруллӑ ӗҫӗ­ре пысӑка хурса хаклаҫҫӗ. Вырӑнта туса кӑларакан апат-ҫимӗҫ регион тулашӗнче лайӑх сутӑнни те савӑнтарать.
Республикӑри пӗтӗм ял хуҫалӑх таварӗсем туса илекене ӑнӑҫлӑ аталану, ырлӑх, ҫӗнӗ ҫитӗнӳсем тата пысӑк тухӑҫ сунатӑп!

Чӑваш Республикин Пуҫлӑхӗ Михаил Игнатьев