Республика Пуçлăхĕ пултаруллă çамрăксене çулсерен паракан стипендине тивĕçнисен йышĕнче Елчĕк студенчĕсем те пур. Кăçал сумлă списока Чăваш ялхуçалăх академийĕн виççĕмĕш курс студенчĕ Алексей Леонтьев та кĕчĕ.

Елчĕкри пĕтĕмĕшле пĕлÿ паракан вăтам шкулта 11 класра вĕреннĕ чухне паллашма тÿр килнĕччĕ Алешăпа. Ун чухне вăл «Шкулăн чи лайăх спортсменĕ» ята тивĕçнĕччĕ. Вĕренекен спорта юратнипе районта кăна мар, республикăра та ÿсĕмсем тунăччĕ. Пиллĕкмĕш класранах йĕлтĕрпе чупнă вăл, çак енĕпе пысăк ăмăртусене хутшăннă. Алексей çуллахи полиатлонра республика чемпионĕн ятне те çĕнсе илнĕ, шывра 200 метрлă дистанцие ишессипе район чемпионĕ.

- Манăн атте те спортсмен. Пирĕн çемьере спорт малти вырăнта тăрать, - тенĕччĕ ун чухне шкул ачи.

Чăннипех те, Василий Витальевич Леонтьев атлетикăна кăмăлланипе палăрать районта. Кĕрешÿпе те туслă вăл.

Алексей Леонтьев шкулта лайăх вĕреннĕ. Унăн класс ертÿçи С.Долгов стипендиат çинчен нумай лайăххине каласа пама пултарать. «Алешăсен класĕнчи кашни ача тенĕ пекех пысăк тавракурăмĕпе палăратчĕ. Пĕрле вĕренекенсем кăна мар, кĕçĕннисем те ун пек маттур пулма тăрăшатчĕç. Çавăн пекех вăл физкультурăпа предметсен олимпиадине хастар хутшăнатчĕ. Ишессипе пысăк кăтартусем тăвассишĕн ăнтăлатчĕ, ишев техникине Интернет урлă та вĕренетчĕ. Мухтанатăп эпĕ хамăн вĕренекенпе», - тет Сергей Витальевич.

Елчĕк шкулĕн вĕренекенĕ аслă шкула вĕренме кĕрсен ăсталăхне тата туптанă. Паян биотехнологипе агрономи факультечĕн студенчĕ çуллахи полиатлон спорчĕн мастерĕн кандидачĕ, шывра ишессипе, пневматика винтовкинчен перессипе, çăмăл атлетикăпа нумай хутчен республика чемпионĕ. Елчĕк каччи 2015 çулхи çуллахи полиатлонăн юниорсем хушшинчи Раççей чемпионачĕн тата ăмăртăвĕн пăхăр призерĕ пулса тăчĕ.

Эпир пултаруллă студентпа чăннипех те савăнатпăр, тата пысăк çитĕнÿсем туса район шайне çÿле çĕклессе шанатпăр.

В.СМИРНОВА.
Н.Осипова сăнÿкерчĕкĕнче: А.Леонтьев.
"Елчĕк ен", 23.01.2016.