Услам ĕçĕнчи вăрттăнлăхсене тĕпчес текенсем, çак енĕпе хăйсен ăсталăхне атлантаракансем «Фермер шкулĕнче» пĕлÿ пухрĕç. Патшалăх шайĕнчи вĕрентÿ проекчĕ пулăшнипе çак кунсенче Чăваш Енре 20 вĕренекен алла диплом илчĕç. Усламçăсен ĕçĕ-хĕлĕпе тата вĕсен малашнехи тĕллĕвĕсемпе регион ертÿçи Олег Николаев та паллашрĕ. «Фермер шкулĕ» Чăваш Енре пĕрремĕш çул ĕçлемест, пĕлтtр те çак вĕрентӳ проекчĕ пулăшнипе 27 усламçă çĕнĕ пĕлӳллĕ пулса хăйсен ĕçĕсене аталантарма хавхалану илнĕччĕ. Вĕсен кăтартăвĕсем куç умĕнче. Пуçарăва кулленех ӳстерсе пыракан 12 фермер кăçал тĕрев укçине илме тивĕç пулнă. Çак енĕпе вĕсене пулăшма Чăваш Ен правительстви те тĕрлĕ программăсем йышăннă. Ăнăçлă усламçăсенчен ырă тĕслĕх илекенсем – «Фермер шкулĕн» çĕнĕ юхăмĕнчен вĕренсе тухакансем. 2 уйăх парта хушшинче ларса, тĕрлĕ производствăна çитсе курса хăйсен ĕмĕчĕ-тĕллевĕ патне çывăхланнă хастарсем. АЛЕКСАНДР АФАНАСЬЕВ: «Çĕнĕ юлташсем тупăнчĕç тата. Пулăсем мĕнле тĕрĕс çитĕнтермелле, мĕнле упрамалла, мĕнле унпа усă курмалла, çавна вĕрентрĕç. Вăл маншăн питĕ лайăх япала тесе шутлатăп. Тата хамăн ачасене вĕрентсе пыма. Вăл тепĕр ен, тепĕр çул». Палăртнă шкулăн çĕнĕ юхăмĕнче хальхи технологисем пулăшнипе сыр туса илес вăрттăнлăхсене тĕпченĕ тата аквакультура усламĕ енĕпе çыхăнну ыйтусене тишкернĕ. Валерий Григорьев усламçă темиçе çул ĕнтĕ пулă ĕçĕпе тăрăшать, фермер шкулне те вăл çак енĕпех аталанма килнĕ. Пĕр алăк вырăнне, тӳрех икĕ алăк уçăлнă ун умĕнче. ВАЛЕРИЙ ГРИГОРЬЕВ: «Пулă тăварлани, тĕтĕмленипе ĕçленĕ çĕрте мана çак сыр туни ытларах килĕшсе кайрĕ-ши темелле». Çирĕп те тĕреклĕ хресченпе фермер хуçалăхĕсем йĕркелес тĕллевпе пуçарнă проект Чӑваш Енре ăнăçлă аталанать. Ҫулталӑкра çеç "Фермер шкулӗнче" 54 усламçă пĕлӳ илме пултарнă. "Чи кирли – ял хуçалăх тытăмĕнче ĕçлеме кăсăклă та усăллă пултăр тесе тăрăшмалла. Çак усăлăх пуриншĕн те, ĕçлекенсемшĕн те, халăхшăн та пулмалла», – палăртрĕ регион ертӳçи Олег Николаев.

Юлия Адюкова, Сергей Емельянов